Monday, October 13, 2014

ဂျပန်နိုင်ငံသို့ တိုင်ဖွန်းမုန်တိုင်း ဗွန်ဖွမ် ဝင်ရောက်တိုက်ခတ်

Monday, October13, 2014

အင်အားပြင်းထန်သည့် တိုင်ဖွန်းမုန်တိုင်း ဗွန်ဖွမ်သည် အောက်တိုဘာ (၁၃)ရက်၊ နံနက်ပိုင်းက ဂျပန်နိုင်ငံသို့ ကုန်းတွင်းဝင်ရောက် တိုက်ခတ်ခဲ့ကြောင်း သတင်းရရှိသည်။


မုန်တိုင်း ဝင်ရောက်တိုက်ခတ်မှုကြောင့် လူ(၁)ဦးထက်မနည်း ပျောက်ဆုံးနေပြီး အများအပြား ဒဏ်ရာ ရရှိခဲ့သလို လေယာဉ်ခရီးစဉ် (၃၀၀)ကျော်ကိုလည်း ဆိုင်းငံ့ထားရကြောင်း အာဏာပိုင်များက ဆိုသည်။

ဗွန်ဖွမ်မုန်တိုင်း ကုန်းတွင်းဝင်သည့် အချိန်တွင် လေတိုက်နှုန်းသည် တစ်နာရီ ကီလိုမီတာ (၁၈၀)မျှထိ ပြင်းထန်ခဲ့သည်။ မုန်တိုင်းသည် ကျူရှူးကျွန်းရှိ မာကူရာဇာကီ ဒေသအနီးတွင် ကုန်းတွင်းဝင်ရောက် တိုက်ခတ်ခြင်းဟု မိုးလေဝသ ဌာနက ကြေညာခဲ့သည်။

မုန်တိုင်းသည် အရှေ့မြောက်ဘက် ဒေသသို့ ဆက်လက် ရွေ့လျားပြီး တစ်နာရီလျင် ကီလိုမီတာ (၃၀)နှုန်းထိ အားပျော့သွားဖွယ် ရှိကြောင်းလည်း မိုးလေဝသ ပညာရှင်များက ခန့်မှန်းထားသည်။ အားပျော့သွားသည့် မုန်တိုင်းသည် အစောဆုံးအဖြစ် အောက်တိုဘာ (၁၃)ရက် ညသန်းခေါင် အချိန်ခန့်တွင် တိုကျို အပါအဝင် ကန်တို ဒေသထိ ဆက်လက် ရောက်ရှိသွားနိုင်ကြောင်းလည်း သိရသည်။

ဂျပန် သတင်းဌာနများက မုန်တိုင်း၏ အရှိန်အဟုန်ကြောင့် အိမ်တစ်လုံး၏ နံရံများ ပြိုကျသွားပြီး အမိုးများ လွင့်ပျံထွက်သွားပုံကို ပြသခဲ့သည်။ ထိုအချိန်တွင် ကမ်းခြေ၌ လှိုင်းလုံးများ ပြင်းထန်စွာ ရိုက်ခတ်လျက် ရှိသည်။ “မုန်တိုင်းဇုန် သတ်မှတ်ချက်ထဲမှာ ပါဝင်နေဆဲ ဖြစ်တဲ့အတွက် ဒေသခံတွေကို နိုးနိုးကြားကြား သတိရှိနေဖို့ နှိုးဆော်ထားပါတယ်”ဟု မာကူရာဇာကီ၊ သဘာဝ ဘေးအန္တရာယ်ဆိုင်ရာ စီမံကွပ်ကဲမှု ဌာနမှ တာဝန်ရှိသူ နော်ကီဂျိုမိုရီက ပြောကြားခဲ့သည်။

NHK သတင်းဌာနက မုန်တိုင်းနှင့် ဆက်စပ်သော အခြေအနေများကြောင့် အနည်းဆုံး လူ(၄၅)ဦး ထိခိုက်ဒဏ်ရာများ ရရှိခဲ့ကြောင်း ဖော်ပြခဲ့သည်။ အောက်တိုဘာ (၁၂)ရက်က ရှီဇူကာတွင် ပြင်းထန်သော လှိုင်းရိုက်မှုကြောင့် ကမ်းခြေတွင် ငါးဖမ်းနေသူ (၃)ဦး ပင်လယ်ထဲ လွင့်စင်သွားပြီး (၂)ဦးကိုသာ ကယ်တင်နိုင်ခဲ့ကြောင်း သိရသည်။ အသက်(၂၆)နှစ်ရှိ လူတစ်ဦးမှာ ပျောက်ဆုံးနေကြောင်း ဒေသဆိုင်ရာ ရဲတပ်ဖွဲ့က ဆိုသည်။

ဂျပန်တွင် လွန်ခဲ့သည့် သီတင်းတစ်ပတ်ခန့်က ဖန်ဖုန်းအမည်ရှိ တိုင်ဖွန်းမုန်တိုင်း ဝင်ရောက်တိုက်ခတ်ခဲ့သေးပြီး ထိုစဉ်က လူ(၁၁)ဦးထိ အသေအပျောက် ရှိခဲ့သည်။

Ref: Channelnewsasia
7Day News Journal

No comments: